AQShning qariyb barcha prezidentlik saylovlari natijalarini oldindan to‘g‘ri topgan Nyu-York universiteti professori Xelmat Norpos mamlakatning navbatdagi prezidenti Donald Tramp bo‘lishini ma’lum qildi. Bu haqda “Interfaks” xabar bermoqda.
Norpos matematik model ishlab chiqqan bo‘lib, u AQSh prezidentligiga so‘nggi 100 yil davomida bo‘lib o‘tgan barcha saylovlar natijalarini bexato topgan: model “real vaqt” rejimida ham tekshirib ko‘rilgan, uni ko‘p yillar avval bo‘lib o‘tgan saylovlar uchun ham qo‘llab ko‘rishgan.
Matematik model faqat bir marta — 2000 yilgi saylovlarda g‘olib nomini to‘g‘ri topa olmagan. O‘shanda model Albert Gor prezident bo‘lishini taxmin qilgandi, biroq saylov natijasi — Jorj Bushning g‘olib chiqqani ovozlarning uzoq davom etgan hisob-kitobidan so‘ng e’lon qilingan.
Olimning so‘zlariga ko‘ra, model hisob-kitob uchun praymeriz natijalarini oladi — kim partiya ichida bo‘ladigan dastlabki saylovlarda ko‘proq ovoz olgan bo‘lsa, oxir-oqibat o‘sha prezident bo‘ladi. “Praymerizda nomzodlar orasida eng kuchlisi Tramp edi va u prezident bo‘ladi, deb hisoblayman”, — dedi Norpos.
Professor bir vaqtlar o‘zi ishlab chiqqan modelning samaradorligini isbotlash maqsadida, uni avval bo‘lib o‘tgan saylovlar misolida tekshirib ko‘rgan edi. Praymeriz natijalarini o‘rganib chiqqan model saylov oxirida kim AQSh prezidenti bo‘lganini to‘g‘ri topgan edi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)