АҚШнинг қарийб барча президентлик сайловлари натижаларини олдиндан тўғри топган Нью-Йорк университети профессори Хелмат Норпос мамлакатнинг навбатдаги президенти Дональд Трамп бўлишини маълум қилди. Бу ҳақда «Интерфакс» хабар бермоқда.
Норпос математик модель ишлаб чиққан бўлиб, у АҚШ президентлигига сўнгги 100 йил давомида бўлиб ўтган барча сайловлар натижаларини бехато топган: модель «реал вақт» режимида ҳам текшириб кўрилган, уни кўп йиллар аввал бўлиб ўтган сайловлар учун ҳам қўллаб кўришган.
Математик модель фақат бир марта — 2000 йилги сайловларда ғолиб номини тўғри топа олмаган. Ўшанда модель Альберт Гор президент бўлишини тахмин қилганди, бироқ сайлов натижаси — Жорж Бушнинг ғолиб чиққани овозларнинг узоқ давом этган ҳисоб-китобидан сўнг эълон қилинган.
Олимнинг сўзларига кўра, модель ҳисоб-китоб учун праймериз натижаларини олади — ким партия ичида бўладиган дастлабки сайловларда кўпроқ овоз олган бўлса, охир-оқибат ўша президент бўлади. «Праймеризда номзодлар орасида энг кучлиси Трамп эди ва у президент бўлади, деб ҳисоблайман», — деди Норпос.
Профессор бир вақтлар ўзи ишлаб чиққан моделнинг самарадорлигини исботлаш мақсадида, уни аввал бўлиб ўтган сайловлар мисолида текшириб кўрган эди. Праймериз натижаларини ўрганиб чиққан модель сайлов охирида ким АҚШ президенти бўлганини тўғри топган эди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)