Toshkentda o‘tayotgan “Shaxmat Yulduzlari” musobaqasining birinchi kunidan so‘ng o‘zbekistonlik grossmeyster Rustam Qosimjonov 2-o‘rinni egallab turibdi. Bu haqda “Olamsport” nashri xabar berdi.
“Miran” mehmonxonasida ochilish marosimi bo‘lib o‘tgan festivalning ilk kunida 4 nafar ishtirokchi grossmeysterning har biri 3 tadan o‘yinda ishtirok etdi. Ya’ni, ular bir-biriga qarshi bir martadan dona surdi.
O‘tkazilgan o‘yinlarning faqatgina 1 tasida g‘olib nomi aniqlanib, ozarbayjonlik Shahriyor Mamadiyorov isroillik raqibi Boris Gelfandni mag‘lub etdi. Qolgan barcha partiyalar durang bilan yakunlandi. Rustam Qosimjonov o‘zi bilan bir xilda ochkosi bor bo‘lgan ukrainalik Ruslan Ponomaryovni qo‘shimcha ko‘rsatkichlar bo‘yicha ortda qoldirmoqda.
Bugun — 19-oktabr kuni bo‘lib o‘tadigan ikkinchi kunda ham grossmeysterlar o‘zaro bir martadan raqib bo‘lib chiqadi.
“Shaxmat Yulduzlari” 1-tur uchrashuvlari 18-oktabr, seshanba
Ponomaryov — Qosimjonov 0,5:0,5Gelfand — Mamadiyorov 0:1
Gelfand — Ponomaryov 0,5:0,5Mamadiyorov — Qosimjonov 0,5:0,5
Ponomaryov — Mamadiyorov 0,5:0,5Qosimjonov — Gelfand 0,5:0,5
Ma’lumot uchun, turnirning umumiy mukofot jamg‘armasi 50 ming AQSh dollari bo‘lib, Amir Temur tavalludining 680-yilligi uchun o‘tkazilayotgan mazkur musobaqada g‘olib chiqqan grossmeyster o‘z hisob raqamini 20 ming dollarga boyitib oladi.
Izoh (0)