Oliy Majlis Qonunchilik palatasi Kengashi tomonidan O‘zbekiston Respublikasi Prezidentining qonunchilik tashabbusi huquqi asosida kiritilgan “Korrupsiyaga qarshi kurashish to‘g‘risida”gi Qonun loyihasini Qonunchilik palatasi majlisida ko‘rib chiqish masalasi muhokama etildi. Bu haqda palata matbuot xizmati xabar bermoqda.
Qonun loyihasi fuqarolar huquq va erkinliklari himoya qilinishini ta’minlashning qo‘shimcha huquqiy kafolatlarini yaratishi, xususiy mulk huquqiga g‘ayriqonuniy tajovuzlar, tadbirkorlik subyektlarining faoliyatiga asossiz aralashuvlarni cheklashga, shuningdek, mamlakatning investitsiyaviy jozibadorligi oshishiga xizmat qilishi alohida qayd etildi.
— Qonun loyihasida korrupsiyaga qarshi kurashishning asosiy tamoyillari, bu boradagi davlat siyosatining muhim yo‘nalishlari, vakolatli organlar tizimi, fuqarolar o‘zini o‘zi boshqarish organlari, fuqarolik jamiyati institutlari, OAV va fuqarolarning ishtirokining nazarda tutilayotgani mamlakatda demokratik islohotlarni chuqurlashtirish, kuchli fuqarolik jamiyatini shakllantirish borasida olib borilayotgan ishlarning yana bir amaliy ifodasi bo‘ladi, — deydi palataning Qonunchilik va sud-huquq masalalari qo‘mitasi a’zosi Shuhrat Mamajonov.
Kengash qaroriga muvofiq, qonun loyihasiga Qonunchilik va sud-huquq masalalari qo‘mitasi mas’ul etib belgilandi va ishchi guruhi shakllantirildi.
Qonun loyihasi Qonunchilik palatasining shu yil 20-oktabr kuni bo‘lib o‘tadigan majlisida birinchi o‘qishda ko‘rib chiqiladi.
Izoh (0)