Олий Мажлис Қонунчилик палатаси Кенгаши томонидан Ўзбекистон Республикаси Президентининг қонунчилик ташаббуси ҳуқуқи асосида киритилган «Коррупцияга қарши курашиш тўғрисида»ги Қонун лойиҳасини Қонунчилик палатаси мажлисида кўриб чиқиш масаласи муҳокама этилди. Бу ҳақда палата матбуот хизмати хабар бермоқда.
Қонун лойиҳаси фуқаролар ҳуқуқ ва эркинликлари ҳимоя қилинишини таъминлашнинг қўшимча ҳуқуқий кафолатларини яратиши, хусусий мулк ҳуқуқига ғайриқонуний тажовузлар, тадбиркорлик субъектларининг фаолиятига асоссиз аралашувларни чеклашга, шунингдек, мамлакатнинг инвестициявий жозибадорлиги ошишига хизмат қилиши алоҳида қайд этилди.
— Қонун лойиҳасида коррупцияга қарши курашишнинг асосий тамойиллари, бу борадаги давлат сиёсатининг муҳим йўналишлари, ваколатли органлар тизими, фуқаролар ўзини ўзи бошқариш органлари, фуқаролик жамияти институтлари, ОАВ ва фуқароларнинг иштирокининг назарда тутилаётгани мамлакатда демократик ислоҳотларни чуқурлаштириш, кучли фуқаролик жамиятини шакллантириш борасида олиб борилаётган ишларнинг яна бир амалий ифодаси бўлади, — дейди палатанинг Қонунчилик ва суд-ҳуқуқ масалалари қўмитаси аъзоси Шуҳрат Мамажонов.
Кенгаш қарорига мувофиқ, қонун лойиҳасига Қонунчилик ва суд-ҳуқуқ масалалари қўмитаси масъул этиб белгиланди ва ишчи гуруҳи шакллантирилди.
Қонун лойиҳаси Қонунчилик палатасининг шу йил 20 октябрь куни бўлиб ўтадиган мажлисида биринчи ўқишда кўриб чиқилади.
Изоҳ (0)