AQSh o‘z ittifoqchilari bilan IShID terrorchilik tashkilotini yo‘q qilish uchun barcha sohalardagi harakatlarini faollashtiradi. Bu haqda Oq uy AQSh prezidenti Barak Obama tomonidan chaqirilgan Milliy xavfsizlik kengashi majlisi yakunlariga tayanib ma’lum qildi, deb yozadi “Interfaks”.
“Prezident jamoasi butun dunyo bo‘yicha ittifoqchilari bilan hamkorlikda harbiy, razvedka, huquqiy va diplomatik chora-tadbirlarni qo‘llagan holda IShIDning tajovuzkor hujumlariga qarshi harakatlarni davom ettirishini alohida ta’kidlab o‘tdi”, — deyiladi Oq uy saytiga joylashtirilgan xabarda.
Unda ta’kidlanishicha, prezident Barak Obama AQShga nisbatan hujumlarning oldini olish hamda Suriyada IShID va “Al-Qoida” tomonidan tahdidlarga qarshi turish ustuvor vazifa ekanligiga urg‘u bergan.
Xabarda yana qayd etilishicha, Suriyadagi terrorchilarga qarshi xalqaro koalitsiya Suriya va Iroqda IShIDga muvofiqlashtirilgan bosim o‘tkazish chorasini qo‘llaydi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)