Respublika bojxonachilari tomonidan tarkibida giyohvandlik vositalari va psixotrop moddalar bo‘lgan dori vositalarini O‘zbekiston hududiga olib kirishga urinishlarning oldi olinmoqda. Bu haqda O‘zbekiston Respublikasi Davlat bojxona qo‘mitasi “Daryo”ga ma’lum qildi.
Jumladan, Moskvadan uchib kelgan quvalik N.Zohidovaning (maqoladagi barcha ism-shariflar o‘zgartirilgan) qo‘l yuklari Andijon aeroportida bojxonachilar tomonidan ko‘zdan kechirilganda, u bojxona nazoratidan yashirin ravishda 90 dona “Fenazepam” psixotrop tabletkasini olib kirishga uringani fosh bo‘ldi.
Surxondaryo viloyati “Sariosiyo” chegara-bojxona posti orqali qo‘shni davlatdan kirib kelgan piyodalardan biri, xorijiy davlat fuqarosi P.Stefanga tegishli qo‘l yuklari bojxona nazoratidan o‘tkazilganda, bu shaxs “Fenazepam”, “Diazepam” kabi 4 turdagi 121 dona psixotrop tabletkani noqonuniy ravishda olib kirishga uringanligi aniqlandi.
Qoraqalpog‘iston Respublikasi bojxona boshqarmasi xodimlari ham huquqni muhofaza qiluvchi idoralar vakillari bilan hamkorlikda mazkur yo‘nalishdagi bir nechta bojxona qoidabuzarliklarini bartaraf qildi.
Jumladan, “Dovut ota” chegara-bojxona postida qo‘shni davlatdan kirib kelgan denovlik I.Ochilov boshqaruvidagi Nexia avtomashinasi bojxona ko‘rigidan o‘tkazilganda, ushbu shaxs yo‘lovchi bojxona deklaratsiyasida ko‘rsatilmagan 50 dona “Fenazepam” psixotrop tabletkasini hech qanday hujjatlarsiz olib kirishga uringani ma’lum bo‘ldi.
Toshkent shahar bojxona boshqarmasi xodimlari tomonidan ham tarkibida psixotrop moddalar mavjud bo‘lgan dori vositalarining noqonuniy ravishda olib kirilishiga qarshi chora-tadbirlar davom ettirilmoqda.
Jumladan, “Keles” temir yo‘l chegara bojxona postida Ufa—Toshkent yo‘nalishidagi yo‘lovchi poyezdi yo‘lovchisi, xorijiy fuqaro M.Gaziyeva sumkasiga 33 dona “Fenazepam” tabletkasini yashirganligi aniqlandi.
So‘nggi paytlarda tarkibida narkotik va psixotrop moddalari mavjud bo‘lgan dori vositalarini pochta jo‘natmalarida yuborish holatlari ham uchrab turibdi.
Jumladan, “Boshpochtamt” tashqi iqtisodiy faoliyat bojxona postida Toshkentda istiqomat qiluvchi Ch.Anastasiya nomiga yuborilgan pochta jo‘natmasi amaldagi tartiblarga muvofiq bojxona ko‘rigidan o‘tkazilganda, ushbu jo‘natmadagi buyumlar orasida 2 turdagi dori vositasi, shu jumladan 150 dona “Fenazepam” tabletkasi borligi aniqlandi.
Hozirda mazkur holatlar yuzasidan bojxona tekshiruvlari va surishtiruv jarayonlari davom ettirilmoqda.
Izoh (0)