Таркибида гиёҳвандлик воситалари ва психотроп моддалар бўлган дори воситаларини Ўзбекистон ҳудудига олиб киришга уринишларнинг олди олинди

Республика божхоначилари томонидан таркибида гиёҳвандлик воситалари ва психотроп моддалар бўлган дори воситаларини Ўзбекистон ҳудудига олиб киришга уринишларнинг олди олинмоқда. Бу ҳақда Ўзбекистон Республикаси Давлат божхона қўмитаси «Дарё»га маълум қилди.

Жумладан, Москвадан учиб келган қувалик Н.Зоҳидованинг (мақоладаги барча исм-шарифлар ўзгартирилган) қўл юклари Андижон аэропортида божхоначилар томонидан кўздан кечирилганда, у божхона назоратидан яширин равишда 90 дона «Феназепам» психотроп таблеткасини олиб киришга урингани фош бўлди.

Сурхондарё вилояти «Сариосиё» чегара-божхона пости орқали қўшни давлатдан кириб келган пиёдалардан бири, хорижий давлат фуқароси П.Стефанга тегишли қўл юклари божхона назоратидан ўтказилганда, бу шахс «Феназепам», «Диазепам» каби 4 турдаги 121 дона психотроп таблеткани ноқонуний равишда олиб киришга уринганлиги аниқланди.

Қорақалпоғистон Республикаси божхона бошқармаси ходимлари ҳам ҳуқуқни муҳофаза қилувчи идоралар вакиллари билан ҳамкорликда мазкур йўналишдаги бир нечта божхона қоидабузарликларини бартараф қилди.

Жумладан, «Довут ота» чегара-божхона постида қўшни давлатдан кириб келган деновлик И.Очилов бошқарувидаги Nexia автомашинаси божхона кўригидан ўтказилганда, ушбу шахс йўловчи божхона декларациясида кўрсатилмаган 50 дона «Феназепам» психотроп таблеткасини ҳеч қандай ҳужжатларсиз олиб киришга урингани маълум бўлди.

Тошкент шаҳар божхона бошқармаси ходимлари томонидан ҳам таркибида психотроп моддалар мавжуд бўлган дори воситаларининг ноқонуний равишда олиб кирилишига қарши чора-тадбирлар давом эттирилмоқда.

Жумладан, «Келес» темир йўл чегара божхона постида Уфа—Тошкент йўналишидаги йўловчи поезди йўловчиси, хорижий фуқаро М.Газиева сумкасига 33 дона «Феназепам» таблеткасини яширганлиги аниқланди.

Сўнгги пайтларда таркибида наркотик ва психотроп моддалари мавжуд бўлган дори воситаларини почта жўнатмаларида юбориш ҳолатлари ҳам учраб турибди.

Жумладан, «Бошпочтамт» ташқи иқтисодий фаолият божхона постида Тошкентда истиқомат қилувчи Ч.Анастасия номига юборилган почта жўнатмаси амалдаги тартибларга мувофиқ божхона кўригидан ўтказилганда, ушбу жўнатмадаги буюмлар орасида 2 турдаги дори воситаси, шу жумладан 150 дона «Феназепам» таблеткаси борлиги аниқланди.

Ҳозирда мазкур ҳолатлар юзасидан божхона текширувлари ва суриштирув жараёнлари давом эттирилмоқда.