O‘zbekistonlik FIFA referisi Ravshan Ermatov Rossiya va Kosta-Rika termalari ishtirokidagi o‘yinda ishlashi haqida xabar berilgandi. Shundan keyin “Sport-Ekspress” nashri jurnalisti Vitaliy Ayrapetov Ermatov bilan qisqa intervyu uyushtirdi.
“Bu o‘yinni boshqarish men uchun yoqimli. Krasnodardagi yangi stadion va undagi go‘zallik… — deb gap boshladi Ermatov. — Men oldin Rossiya — Ozarbayjon o‘yinida ishlagandim. Kosta-Rika bilan ham tanishman. Yodingizda bo‘lsa, Jahon Chempionatida ularning Gollandiyaga qarshi o‘yinini boshqarganman. O‘shanda Kosta-Rika gollandlarga yetarlicha muammo tug‘dira olgandi. Rossiya termasi raqib sifatida Kosta-Rikani tanlab, to‘g‘ri qilgan deb o‘ylayman”.
Yangi tashkil etilgan Rossiya terma jamoasi haqida Ravshan Ermatov hech narsa ayta olmasligi, ayni paytda uning bor e’tibori Saudiya Arabistoni — Avstraliya o‘yiniga qaratilganini ma’lum qilgan. Shu bilan birgalikda, Rossiya futbolni yetarli darajada kuzatib borishi haqida aytgan.
Ermatov, shuningdek, Rossiya termasi safidagi eng qo‘pol futbolchi kim degan savolga javob berishni istamagan. Rus jurnalistining hakam mezbonlarga yon bosishi mumkinmi qabilidagi savoliga o‘zbekistonlik referi quyidagicha javob qaytardi:
“Men Rossiyani yaxshi ko‘rsamda, maydonda professionalman. Bir vaqtlar O‘zbekiston — Eron o‘yinini boshqarib, Odil Ahmedovni qizil kartochka bilan maydondan haydaganman. Shundan kelib chiqib, Rossiyaga yon bosmasligim aniq. Hammasi xolisona bo‘ladi”.
Izoh (0)