Pokistonning BMTdagi vakili Malixa Lo‘diy bahsli Kashmirdagi Hindistonning harakatlarini muhokama etish uchun BMT bosh kotibi Pan Gi Mun bilan uchrashish niyatida. Bu haqda Pokistonning Geo TV telekanali ma’lum qildi, deb yozadi “TASS”.
U, shuningdek, BMT Xavfsizlik kengashi raisi, yangi zelandiyalik Jerard van Boxemendan Pokiston va Hindiston o‘rtasidagi vaziyat keskinlashganligi haqida Xavfsizlik kengashini xabardor etishni so‘radi.
“Xalqaro hamjamiyatga murojaat qilishdan maqsadimiz inqirozni u yuz berishidan avval oldini olish”, — dedi Lo‘diy.
Uning ta’kidlashicha, Islomobod bahsli Kashmirda Hindiston va Pokiston qo‘shinlarini ajratib turuvchi Nazorat chizig‘i hududida vaziyatning keskinlashuviga xalqaro e’tiborni qaratish niyatida.
Eslatib o‘tamiz, Pokiston va Hindiston harbiy xizmatchilari o‘rtasida 29-sentabr, payshanba kuni tongda Kashmirda yuz bergan otishmada kamida ikki nafar pokistonlik harbiy halok bo‘lganligi haqida ma’lum qilingan edi.
Izoh (0)