Shveysariyada bo‘lib o‘tgan referendumda fuqarolar qarilik pensiyasining 10 foizga oshirilishiga qarshi ovoz berdi. Bu haqda “RBK” xabar qilmoqda.
Kasaba uyushmalari va so‘l partiyalar bazaviy davlat pensiya sug‘urtasi bo‘yicha to‘lovlarning 10 foizga oshirilishi qonunda belgilanishi uchun kurash olib borayotgan edi. Bunda yolg‘iz nafaqaxo‘rlar davlatdan yiliga 1400–2800 frank, juftliklar esa 4200 frankka ko‘proq pul olishi lozim edi. Tashabbus “AHVplus — salmoqli pension ta’minot uchun” shiori ostida ilgari surilayotgan edi.
Ammo hukumat bu taklifni ortiq darajada serxarajat deb hisoblab, fuqarolarni qarshi ovoz berishga chaqirgan edi. Hisob-kitoblarga qaraganda, agar islohot amalga oshsa, 2018-yilda pensiyaga qo‘shimcha ravishda 4 milliard frank, 2030-yilga kelib esa 5,5 milliard frank sarflashga to‘g‘ri keladi. Bu xarajatlarni qoplash uchun ishchilar va ish beruvchilardan undiriladigan to‘lovlarni 0,4 foizga oshirishga to‘g‘ri kelar edi.
Taklifni fransuz tilli Yura, Vo, Jeneva, Nevshatel hamda italyan tilli Tichino kantonlari (jami beshta) aholisi qo‘llab-quvvatladi. Nemis tilli hamda aralash tilli kantonlar (jami 18 ta) aholisining asosiy qismi tashabbusni yoqlamadi.
Oxirgi ma’lumotlarga qaraganda, saylovchilarning 59,4 foizi pension islohotga qarshi ovoz berdi.
Shu referendumning o‘zida boshqa masalalar ham ovozga qo‘yildi. Jumladan, ilgariroq xabar qilinganidek, saylovchilarning 65 foizi maxsus xizmatlarning vakolatlarini kengaytiruvchi qonun loyihasini ma’qulladi.
Bundan tashqari, referendumda “yashil iqtisodiyot”ga o‘tish bilan bog‘liq qonunchilik tashabbusi muhokama qilindi. U Shveysariya qonunchiligiga keng miqyosli o‘zgarishlar kiritib, mamlakat taraqqiyotini “yashil” rivojlanish yo‘lidan olib borishni nazarda tutar edi. Ammo shveysariyaliklar, bu ularning odatlangan turmush tarzini o‘zgartirib yuborishidan cho‘chib, tashabbusga qarshi ovoz berdi.
Izoh (0)