Toshkentning sobiq hokimi Jizzax shahar hokimi vazifasiga tasdiqlandi

Xalq deputatlari Jizzax shahar Kengashining sessiyasi bo‘lib o‘tdi. Unda tashkiliy masala ko‘rib chiqildi. Bu haqda O‘zA xabar berdi.

Ish faoliyatida jiddiy kamchiliklarga yo‘l qo‘ygani uchun Jizzax shahar hokimi Asror Qobilov o‘z vazifasidan ozod etildi.

Jizzax viloyatida tashrif bilan bo‘lib turgan O‘zbekiston Respublikasi Prezidenti vazifasini bajaruvchi Shavkat Mirziyoyevning tavsiyasiga ko‘ra Jizzax shahar hokimi vazifasiga Abduqahhor To‘xtayev tasdiqlandi.

Shu kunning o‘zida yana bir nechta tashkiliy masalalar ko‘rib chiqildi. Jumladan, ishda yo‘l qo‘yilgan xato va kamchiliklari uchun Jizzax viloyati prokurori, shuningdek, qator tuman hokimlari egallab turgan lavozimidan ozod etildi va ularning o‘rniga yangi nomzodlar tasdiqlandi.

Jizzax viloyati rahbariyati zimmasiga aniqlangan kamchiliklarni bartaraf qilish, barcha soha va tarmoqlarni rivojlantirish bo‘yicha belgilangan dasturlarni hayotga izchil joriy etish va ularning samaradorligini oshirishga yo‘naltirilgan dolzarb va istiqbolli chora-tadbirlar belgilash vazifasi yuklatildi.

Abduqahhor To‘xtayev ilgari Toshkent shahar hokimi vazifasida ishlagan.