2016-yil 16-sentabr kuni Toshkent shahrida O‘zbekiston “Milliy tiklanish” demokratik partiyasi Markaziy Kengashining navbatdagi Plenumi bo‘lib o‘tdi. Bu haqda partiya matbuot xizmati xabar berdi.
Ta’kidlanishicha, unda O‘zbekiston “Milliy tiklanish” demokratik partiyasi Markaziy Kengashi, Oliy Majlis Qonunchilik palatasidagi partiya fraksiyasi va xalq deputatlari mahalliy Kengashlardagi partiya guruhlari a’zolari, partiya faollari va ommaviy axborot vositalari vakillari ishtirok etdi.
“Plenumda 2016-yil 4-dekabr kuni bo‘lib o‘tadigan O‘zbekiston Respublikasi Prezidenti saylovida O‘zbekiston “Milliy tiklanish” demokratik partiyasining ishtiroki, O‘zbekiston Respublikasi Prezidentligiga “Milliy tiklanish” demokratik partiyasidan nomzod ko‘rsatish taklifi hamda partiyaning navbatdagi syezdini chaqirish to‘g‘risidagi masalalar muhokama qilindi”, — deyiladi xabarda.
Plenumda e’tirof etilganidek, O‘zbekiston Respublikasi Markaziy saylov komissiyasi tomonidan 2016-yilning 9-sentabridan O‘zbekiston Respublikasi Prezidenti saylovi bo‘yicha saylov kampaniyasi boshlanganligi e’lon qilindi. Shuningdek, O‘zbekiston Respublikasi Prezidenti sayloviga tayyorgarlik ko‘rish va uni o‘tkazish bo‘yicha asosiy tadbirlar dasturi tasdiqlandi.
Plenumda ta’kidlanganidek, O‘zbekiston “Milliy tiklanish” demokratik partiyasining Ustavida partiyaning O‘zbekiston Respublikasi Prezidentligiga bo‘lib o‘tadigan saylovlarda ishtirok etishi belgilangan. Shundan kelib chiqqan holda Plenumda partiyaning O‘zbekiston Respublikasi Prezidenti saylovida ishtirok etishi to‘g‘risida qaror qabul qilindi.
“O‘zbekiston Respublikasi Prezidenti lavozimiga O‘zbekiston ‘Milliy tiklanish’ demokratik partiyasidan nomzod ko‘rsatish taklifi Plenum a’zolarining fikr-mulohazalari va takliflari asosida ko‘rib chiqildi. Bu borada partiya tarafdorlari va faollari tomonidan qo‘llab-quvvatlangan O‘zbekiston ‘Milliy tiklanish’ demokratik partiyasi Markaziy Kengashi raisi, partiyaning Oliy Majlis Qonunchilik palatasidagi fraksiyasi rahbari Otamuratov Sarvar Sadullayevich syezdda ko‘rib chiqish uchun partiyadan O‘zbekiston Respublikasi Prezidenti lavozimiga nomzod sifatida ma’qullandi”, — deyiladi xabarda.
Qayd etilishicha, amaldagi saylov qonunchiligiga asosan, O‘zbekiston Respublikasi Prezidenti lavozimiga partiya tomonidan nomzod ko‘rsatish partiyaning oliy organi – Syezdi tomonidan amalga oshiriladi. Shundan kelib chiqib, Plenumda joriy yil 15-oktyabr kuni partiyaning navbatdagi V syezdini chaqirish va bu masalani syezd muhokamasiga qo‘yishga kelishib olindi.
Plenum so‘ngida muhokama etilgan barcha masalalar yuzasidan tegishli qarorlar qabul qilindi.
“O‘zbekiston Respublikasi Prezidenti saylovi to‘g‘risida”gi Qonuniga asosan O‘zbekiston “Milliy tiklanish” demokratik partiyasining O‘zbekiston Respublikasi Prezidenti saylovida ishtirok etishiga ijozat olish uchun partiya tomonidan Markaziy saylov komissiyasiga belgilangan hujjatlar taqdim etiladi.
Izoh (0)