Ilon Maskning SpaceX kompaniyasiga qarashli Falcon 9 raketa tashuvchisi Kanaveral burnida (AQSh, Florida shtati) joylashgan SLC-40 parvoz platformasidagi sinov chog‘ida portlab ketdi. Hodisa 1-sentabr, payshanba, soat 18:00 atrofida ro‘y berdi, deb xabar beradi “RBK”.
ABC manbalariga ko‘ra, oradan 20 daqiqa o‘tib yana bir necha portlash sodir bo‘ldi, osmonni quyuq tutun qopladi. Portlash ta’siri bir necha kilometr uzoqlikdagi binolarda ham bilindi. Mahalliy favqulodda xizmatlarning bildirishicha, hodisa aholi uchun xavf tug‘dirmadi.
Portlash 3-sentabr, shanba kuni uchirilishi lozim bo‘lgan Falcon 9 sinovi chog‘ida ro‘y berdi. Raketa tashuvchi Spacecom Ltd kompaniyasining (Isroil) qiymati 200 million dollar bo‘lgan kommunikatsiya sun’iy yo‘ldoshini orbitaga olib chiqishi rejalashtirilgandi. Hodisa tufayli ushbu qurilma ham yo‘qotildi.
SpaceX yuz bergan voqeani tasdiqladi va portlashga parvoz platformasidagi “me’yordan og‘ish” sabab bo‘lganini bildirdi.
Izoh (0)