Samsung Galaxy Note 7 xalqaro miqyosda sotuvi boshlanganidan ko‘p o‘tmay O‘zbekiston bozoriga ham kirib keldi. Tashqi ko‘rinishidan yangilik Galaxy Note 5 smartfoniga juda o‘xshab ketadi. Bu haqda “Mobinfo.uz” xabar bermoqda.
Qurilma 5,7 dyuymli Super AMOLED-displey (QHD, 2560 x 1440 piksel), Dual Pixel texnologiyasiga asoslangan 12 megapikselli asosiy, 5 megapikselli frontal kameraga ega bo‘ldi. Shuningdek, smartfonda barmoq izlari skaneridan tashqari ko‘z qorachig‘idan foydalanuvchini aniqlash skaneri paydo bo‘ldi. Galaxy Note turkumi uchun birinchi marta IP68 standarti asosida suv va changdan himoya qilish xususiyati qo‘llanildi: smartfonning o‘zigina emas, S Pen elektron perosi ham tashqi ta’sirlardan himoyalangan.
Samsung Galaxy Note 7 o‘lchami 153,5 x 73,9 x 7,9 millimetr, og‘irligi esa 169 grammga teng. Telefon Android 6.0.1 Marshmallow operatsion tizimi boshqaruvida ishlaydi.
Kutilganidek, Samsung Galaxy Note 7 ushbu kompaniyaning sotuvdagi eng qimmat modeliga aylandi. Toshkent bozorlarida smartfonning 64 gigabaytli versiyasi 6 million so‘mdan taklif etilmoqda. Taqqoslash uchun, hozirda 128 gigabaytli Apple iPhone 6S Plus’ni taxminan 5,6 million so‘mga sotib olish mumkin.
Sotuvchilarga ko‘ra, yangilikka bo‘lgan yuqori talab tufayli tanqislik yuzaga keldi va narx ko‘tarilib ketdi. Vaqt o‘tishi bilan smartfonning qiymati pasayishi aytilmoqda.
Ushbu qurilmani ko‘rsatilgan narxda sotib olishga “Daryo” nashri kafolat bermaydi. Qurilma va uning narxi haqidagi axborot faqat tanishish uchun taqdim etilgan.
Izoh (0)