Илон Маскнинг SpaceX компаниясига қарашли Falcon 9 ракета ташувчиси Канаверал бурнида (АҚШ, Флорида штати) жойлашган SLC-40 парвоз платформасидаги синов чоғида портлаб кетди. Ҳодиса 1 сентябрь, пайшанба, соат 18:00 атрофида рўй берди, деб хабар беради «РБК».
ABC манбаларига кўра, орадан 20 дақиқа ўтиб яна бир неча портлаш содир бўлди, осмонни қуюқ тутун қоплади. Портлаш таъсири бир неча километр узоқликдаги биноларда ҳам билинди. Маҳаллий фавқулодда хизматларнинг билдиришича, ҳодиса аҳоли учун хавф туғдирмади.
Портлаш 3 сентябрь, шанба куни учирилиши лозим бўлган Falcon 9 синови чоғида рўй берди. Ракета ташувчи Spacecom Ltd компаниясининг (Исроил) қиймати 200 миллион доллар бўлган коммуникация сунъий йўлдошини орбитага олиб чиқиши режалаштирилганди. Ҳодиса туфайли ушбу қурилма ҳам йўқотилди.
SpaceX юз берган воқеани тасдиқлади ва портлашга парвоз платформасидаги «меъёрдан оғиш» сабаб бўлганини билдирди.
Изоҳ (0)