O‘zbekiston 2017-yil 1-yanvardan iqtisodiy faoliyat turlarini tasniflashning xalqaro tizimiga o‘tadi, deya xabar bermoqda UzDaily Vazirlar Mahkamasi qarori (pdf)ga tayanib.
Hujjatda qayd etilishicha, O‘zbekiston Respublikasi Davlat statistika qo‘mitasi Yevropa Ittifoqining iqtisodiy faoliyat turlarini statistik tasniflashi negizida ishlab chiqilgan O‘zbekiston Respublikasi Iqtisodiy faoliyat turlarining umumdavlat tafnislagichiga o‘tadi.
Davlat boshqaruvi organlarining idoralararo o‘zaro hamkorligida, statistika, soliq va moliyaviy hisobot shakllarida Iqtisodiy faoliyat turlarining umumdavlat tafnislagichidan foydalanish majburiydir.
Yuridik shaxslar to‘g‘risidagi axborotlarni saqlovchi va ular bilan ishlovchi davlat organlarining axborot tizimlari va resurslarida Iqtisodiy faoliyat turlarining umumdavlat tafnislagichidan foydalanish uchun u “Elektron hukumat” tizimining ma’lumotlari va klassifikatorlari registriga kiritiladi.
Qarorga muvofiq, kichik tadbirkorlik subyektlariga tegishli bo‘lgan tashkilotlarning Iqtisodiy faoliyat turlarining umumdavlat tafnislagichi asosida takomillashtirilgan tasniflagichi tasdiqlandi. Ushbu qaror 2017-yil 1-yanvardan kuchga kiradi.
Izoh (0)