Rossiyaning Omsk viloyatida ikki erkak oziq-ovqat do‘konchasini demontaj qilib, ichidagi sotuvchisi bilan birga olib ketdi, deya xabar bermoqda TJournal.
Ikki yigit salqin ichimliklar savdosi bilan shug‘ullanadigan do‘konchaning eshigini taqillatib, o‘zlarini Omsk markaziy okrugi ma’muriyati xodimlari deb tanishtirdi. Ular 20 yoshli sotuvchi qizga do‘koncha noqonuniy ekanligi va buzilishi kerakligini ma’lum qildi. Qiz ko‘chaga yugurib chiqishga urindi, ammo uni ichkariga itarib, qamab qo‘yishdi.
So‘ng do‘konchani yuk ortuvchi mashina yordamida yuk mashinasi kuzoviga joylashtirib, shaharning boshqa burchagidagi ishlab chiqarish bazasiga eltishdi.
Yo‘lda qizning boshiga bir yarim litrli idishdagi ichimlik qulab tushdi. Qiz boshqaruvchiga qo‘ng‘iroq qilib, “meni olib ketishyapti, yordam bering” — deyishga ulgurdi, xolos. Boshqaruvchi qo‘rqib qolgan qizni ishlab chiqarish bazasidan topib, tez yordam chaqirdi. Uning ahvoli haqida xabar berilmayapti.
Tadbirkor do‘konchaning buzilishi haqida uni ikki hafta avval ogohlantirishganini, ammo u bunday masalalar faqat sud orqali hal etiladi, deb hisoblaganini va hamkorlik qilishdan bosh tortganini aytdi. Shunga qaramay, do‘konchani baribir buzishdi.
Tadbirkor va sotuvchi qiz politsiyaga ariza topshirmoqchi.
Izoh (0)