Россияда дўкончани демонтаж қилиб, ичидаги сотувчиси билан бирга олиб кетишди

Россиянинг Омск вилоятида икки эркак озиқ-овқат дўкончасини демонтаж қилиб, ичидаги сотувчиси билан бирга олиб кетди, дея хабар бермоқда TJournal.

Икки йигит салқин ичимликлар савдоси билан шуғулланадиган дўкончанинг эшигини тақиллатиб, ўзларини Омск марказий округи маъмурияти ходимлари деб таништирди. Улар 20 ёшли сотувчи қизга дўконча ноқонуний эканлиги ва бузилиши кераклигини маълум қилди. Қиз кўчага югуриб чиқишга уринди, аммо уни ичкарига итариб, қамаб қўйишди.

Сўнг дўкончани юк ортувчи машина ёрдамида юк машинаси кузовига жойлаштириб, шаҳарнинг бошқа бурчагидаги ишлаб чиқариш базасига элтишди.

Йўлда қизнинг бошига бир ярим литрли идишдаги ичимлик қулаб тушди. Қиз бошқарувчига қўнғироқ қилиб, «мени олиб кетишяпти, ёрдам беринг» — дейишга улгурди, холос. Бошқарувчи қўрқиб қолган қизни ишлаб чиқариш базасидан топиб, тез ёрдам чақирди. Унинг аҳволи ҳақида хабар берилмаяпти.

Тадбиркор дўкончанинг бузилиши ҳақида уни икки ҳафта аввал огоҳлантиришганини, аммо у бундай масалалар фақат суд орқали ҳал этилади, деб ҳисоблаганини ва ҳамкорлик қилишдан бош тортганини айтди. Шунга қарамай, дўкончани барибир бузишди.

Тадбиркор ва сотувчи қиз полицияга ариза топширмоқчи.