BMT Xavfsizlik kengashi yopiq yig‘ilishda Qrimdagi vaziyatni muhokama qildi

BMT Xavfsizlik kengashi Ukraina iltimosiga ko‘ra Qrimdagi vaziyatga bag‘ishlangan yopiq yig‘ilish o‘tkazdi. Bu haqda Meduza xabar bermoqda.

Yig‘ilishdan so‘ng Rossiyaning xalqaro tashkilotdagi doimiy vakili Vitaliy Churkin uchrashuv Rossiya uchun foydali bo‘lgani va boshqa mamlakatlar delegatsiyalari uchun yarim orolda oldi olingan teraktlar haqida ma’lumot taqdim etish imkonini berganini bildirdi.

O‘z navbatida, Ukrainaning BMTdagi doimiy vakili Vladimir Yelchenko yig‘ilish chog‘ida Rossiya delegatsiyasidan Ukraina maxsus xizmatlari Qrimda diversiyalar tayyorlaganini tasdiqlovchi dalillarni namoyish etishni so‘ragan. Biroq Yelchenkoga ko‘ra, Rossiya elchisi “gap-so‘zdan nariga” o‘tmagan.

Ukraina tomoni Qrimdagi diversiyalarga aloqadorlikni qat’iyan rad etmoqda. Kiyevning taxminicha, yarim orolda Rossiya armiyasi va Federal xavfsizlik xizmati bir-biriga o‘q uzgan.