Rossiya Xavfsizlik kengashi mamlakat hukumatiga Transsib, BAM va Shimoliy dengiz yo‘lini bog‘laydigan transport-logistika yo‘laklari tizimini yaratish loyihasini ko‘rib chiqishni taklif qildi, deb yozadi Meduza.
“Yagona Yevrosiyo” deb nom olgan loyiha muallifi Moskva davlat universiteti Moskva iqtisodiyot maktabi rahbari, Rossiya Fanlar akademiyasi akademigi Aleksandr Nekipelovdir.
“Kommersant” nashri qo‘liga kelib tushgan hujjatlarga ko‘ra, loyihaning asosiy maqsadi “mamlakat Sibir, Uzoq Sharq va Arktikani chuqur o‘zlashtirish hisobiga yangi ijtimoiy-iqtisodiy bosqichga chiqishi uchun” sharoitlar yaratishdan iborat.
“Yagona Yevrosiyo”ning qiymati 220—240 milliard dollarga baholanmoqda. Transport-logistika yo‘laklarini 2035-yilgacha yaratib bo‘lish rejalashtirilmoqda.
Loyiha tarkibiy qismlaridan faqat ATLANT (yangi turdagi aerostatik transport uchar qurilmasi) turidagi transport dirijabllarigina yetarlicha batafsil ta’riflangan. Ular yordamida Shimoliy dengiz yo‘li va Transsib o‘rtasidagi yuk oqimini ta’minlash rejalashtirilmoqda.
Izoh (0)