O‘zbekiston jinoiy daromadlarni legallashtirish va terrorchilikni moliyalashtirish xatarini baholash bo‘yicha Basel AML Index 2016 reytingida 101-o‘rinni egalladi va terrorchilikni moliyalashtirish xatari past bo‘lgan mamlakatlar qatoridan o‘rin oldi. Bu haqda UzDaily xabar bermoqda.
Reyting Bazel boshqaruv instituti tomonidan tayyorlangan. Eng yuqori baholash koeffitsiyenti 10 ballga teng bo‘lib, ball qanchalik past bo‘lsa, xatar ham shunchalik kam ekanini anglatadi.
Reyting mamlakat bank tizimining jinoiy daromadlarni legallashtirish va terrorchilikni moliyalashtirish bo‘yicha imkoniyatlarini, korrupsiyaga moyillik, davlat va moliya sektorlari faoliyatining shaffofligi, shuningdek, amaldagi siyosiy tuzum va mahalliy qonunchilikning o‘ziga xosliklarini bevosita qamrab oladi.
Bazel institutining reytingi mamlakatlarning jinoiy daromadlarni legallashtirish va terrorchilikni moliyalashtirish xatarini FATF, Jahon iqtisodiy forumi, Jahon banki, Transparency International kabi ochiq manbalar, shuningdek, reytingga kiritilgan mamlakatlarning statistikasi asosida baholaydi.
Reytingga ko‘ra, O‘zbekiston 5,1 indeks bilan reytingda 101-o‘rinni egalladi. Bu borada O‘zbekiston AQSh (97-o‘rin) va Rossiya (58-o‘rin)ni ortda qoldirgan, Markaziy Osiyo mamlakatlari orasida ham eng yaxshi ko‘rsatkichga ega.
Mazkur reytingda Qozog‘iston 71-o‘rinni, Qirg‘iziston 60-o‘rinni, Tojikiston esa 3-o‘rinni egallagan.
Jinoiy daromadlarni legallashtirish va terrorchilikni moliyalashtirish xatari eng yuqori bo‘lgan mamlakatlar uchligidan Eron (1-o‘rin), Afg‘oniston (2-o‘rin) va Tojikiston o‘rin olgan. Eng past ko‘rsatkich esa Finlyandiya (149-o‘rin), Litva (148-o‘rin) va Estoniya (147-o‘rin)da qayd etilgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)