Respublika bolalar ijtimoiy ko‘nikma markazida Yevropa Ittifoqi bilan hamkorlikdagi “O‘zbekistonda maxsus ehtiyojli bolalar uchun inklyuziv ta’lim” qo‘shma loyihasi doirasida amalga oshirilgan ishlar natijasiga bag‘ishlangan media-brifing bo‘lib o‘tdi. Bu haqda loyihaning Facebook’dagi sahifasida ma’lum qilindi.
Markaz direktori Vasila Alimovaga ko‘ra, loyiha xalq ta’limi, oliy va o‘rta maxsus ta’lim, sog‘liqni saqlash, mehnat va moliya vazirliklari bilan uzviy hamkorlikda amalga oshirilmoqda. Uning doirasida oliy o‘quv yurtlari talabalari uchun inklyuziv ta’lim kursi joriy etildi, mazkur ta’lim bo‘yicha uzoq muddatli milliy strategiya va 2016—2018-yillarga mo‘ljallangan harakatlar rejasi, shuningdek, bolalar huquqini ta’minlashga qaratilgan qator boshqa hujjatlar ishlab chiqildi.
Loyiha rahbari, xalqaro ekspert Stefaniya Alishauskenening ta’kidlashicha, 800 nafarga yaqin bola odatiy bog‘cha va maktablarda inklyuziv ta’lim kursini o‘tagan pedagoglar yordamida o‘qitila boshlandi. Bundan tashqari, O‘zbekistonning besh mintaqasida 5 ta resurs markazi va 30 ta bog‘cha hamda maktab faoliyati yo‘lga qo‘yildi. Toshkent viloyati bo‘yicha mintaqaviy ekspert Dildora To‘laganova inklyuziv ta’limni ilgari surishda ota-onalar, jamoatchilik va pedagoglar o‘rtasida o‘ziga xos halqa vazifasini o‘tovchi resurs markazlari faoliyati haqida hikoya qildi.
Brifingda jurnalistlar loyiha ekspertlariga bevosita savollar bilan murojaat etish, inklyuziv maktabda birinchi yilni o‘tkazgan bolalarning ota-onalari bilan muloqot qilish, ular erishgan natijalar bilan tanishish imkoniga ega bo‘ldi.
Izoh (0)