OAV: Suriyada xizmatni o‘tagan rossiyalik o‘ninchi harbiy xizmatchi hayotdan ko‘z yumdi

Rossiyadagi “Amur” davlat teleradiokompaniyasi Suriyada xizmat o‘tagan kichik serjant Mixail Shirokopoyas vafot etgani haqida ma’lum qildi. Bu haqda “RBK” xabar bermoqda.

Telekanal intervyu olgan marhumning yaqinlariga ko‘ra, Shirokopoyas 35-umumqo‘shin armiyasida artilleriyachi sifatida xizmat o‘tagan. Uning turmush o‘rtog‘ining ta’kidlashicha, eri 2016-yil aprelida Suriyaga yuborilgan. Oradan bir oy o‘tib mina portlashi tufayli jarohat olgan. Suriyada operatsiya qilingan va davolanish uchun Moskvaga jo‘natilgan. Harbiy xizmatchi Rossiyada hayotdan ko‘z yumgan.

Mahalliy “Amur.info” agentligiga ko‘ra, Shirokopoyasning dafn marosimi 11-iyun, shanba kuni bo‘lib o‘tgan. Kichik serjantga harbiy ehtirom ko‘rsatilgan — marosimda harbiy orkestr va faxriy qoravul ishtirok etgan, uch karra osmonga qarata o‘q uzilgan. Marhumning qarindoshlariga hali tibbiy ekspertiza natijalari, shuningdek, Shirokopoyasga taqdim etilgan davlat mukofoti berilmagani aytilmoqda.