Sobiq birja chayqovchisi, Martin Skorsezening “Uoll-strit bo‘risi” (The Wolf of Wall Street, 2013) filmida Leonardo Di Kaprio personajining prototipi Nyu-Yorkda 53 yoshida vafot etdi. Bu haqda, Fox News telekanali ma’lumotiga tayanib, “TASS” xabar bermoqda.
Bir necha marta qamoqda o‘tirib chiqqan Danu Jaketto shaxsiy kvartirasining to‘shagida o‘lik holda topilgan. Telekanalning ma’lum qilishicha, o‘tgan dam olish kunlari Jaketto bir nechta tungi bazmlarda ishtirok etgan. Nyu-York tungi klublaridan birining kirish qismida uning qo‘riqchilar bilan janjallashib qolganligi haqida guvohlarning ko‘rsatmalari mavjud.
Makler AQShda 1990-yillarda mashhur kishiga aylangan edi. O‘shanda u Di Kaprio va boshqa mashhurlar, jumladan, aktyor Ben Afflek, Mett Deymon, Naomi Kempbell kabilarga moliyaviy xizmatlar ko‘rsatgan. 2001-yilda u firibgarlikda va mijozlaridan 9 million dollar o‘g‘irlashda ayblanib, to‘rt yilu olti oylik qamoq jazosiga hukm etilgan edi. 2014-yilda esa u aviachiptalar, restoranlarda yegulik va ichimliklarni xarid qilishda boshqa odamning kredit kartasidan foydalanganligi uchun qo‘lga tushgan.
Leonardo Di Kaprioni “Uoll-strit bo‘risi” filmida Jordan Belfort obrazini yaratishiga aynan Danu Jaketto ilhomlantirgan.
Izoh (0)