«Уолл-стрит бўриси» фильмида Ди Каприо персонажининг прототипларидан бири ўлик ҳолда топилди

Собиқ биржа чайқовчиси, Мартин Скорсезенинг «Уолл-стрит бўриси» (The Wolf of Wall Street, 2013) фильмида Леонардо Ди Каприо персонажининг прототипи Нью-Йоркда 53 ёшида вафот этди. Бу ҳақда, Fox News телеканали маълумотига таяниб, «ТАСС» хабар бермоқда.

Бир неча марта қамоқда ўтириб чиққан Дану Жакетто шахсий квартирасининг тўшагида ўлик ҳолда топилган. Телеканалнинг маълум қилишича, ўтган дам олиш кунлари Жакетто бир нечта тунги базмларда иштирок этган. Нью-Йорк тунги клубларидан бирининг кириш қисмида унинг қўриқчилар билан жанжаллашиб қолганлиги ҳақида гувоҳларнинг кўрсатмалари мавжуд.

Маклер АҚШда 1990 йилларда машҳур кишига айланган эди. Ўшанда у Ди Каприо ва бошқа машҳурлар, жумладан, актёр Бен Аффлек, Мэтт Дэймон, Наоми Кэмпбелл кабиларга молиявий хизматлар кўрсатган. 2001 йилда у фирибгарликда ва мижозларидан 9 миллион доллар ўғирлашда айбланиб, тўрт йилу олти ойлик қамоқ жазосига ҳукм этилган эди. 2014 йилда эса у авиачипталар, ресторанларда егулик ва ичимликларни харид қилишда бошқа одамнинг кредит картасидан фойдаланганлиги учун қўлга тушган.

Леонардо Ди Каприони «Уолл-стрит бўриси» фильмида Жордан Белфорт образини яратишига айнан Дану Жакетто илҳомлантирган.