Venesuela poytaxtida ochlik qo‘zg‘oloni bo‘lib o‘tdi

Venesuela poytaxti Karakasda oziq-ovqat yetishmovchiligi tufayli ommaviy noroziliklar bo‘lib o‘tdi, deb yozadi “Vedomosti”.

Mahalliy OAVlar yozishicha, do‘konga guruch va shakar yetkazib beruvchi mashinani Milliy gvardiya xizmatchilari to‘xtatib, uni oziq-ovqatlar uchun narx belgilaydigan taqsimot qo‘mitasiga yuborayotganini navbatda turgan odamlar ko‘rgach, norozilik yuzaga kelgan va u ochlik qo‘zg‘oloniga aylanib ketgan. Reuters yozishicha, tartibsizliklarga yuk mashinasining noma’lum shaxslar tomonidan qo‘lga olinishi sabab bo‘lgan.

Namoyishchilar “Yeyishni istaymiz!” degan baqiriqlar bilan prezident Nikolas Maduro qarorgohiga olib boradigan ko‘chaga chiqib, undagi harakatni to‘xtatib qo‘ydi. Milliy gvardiya va politsiya bo‘linmalari ko‘zni yoshlantiruvchi gaz yordamida namoyishchilarni tarqatib yuborishga urindi. Shahar hukumati vakillari ham ular bilan muzokaralarga kirishishga intildi.

Mahalliy OAVlarning norasmiy ma’lumotlariga ko‘ra, kamida 13 kishi qo‘lga olingan, jabrlanganlar bor.