Yaponiyada yetti yoshli Yamato Tanuka ismli bolakay uni yomon xulqi uchun ota-onasi yo‘l chetida qoldirib ketganidan yetti kun o‘tgach, topildi, deb yozadi “RBK” mahalliy OAVlarga tayanib.
Bolani Xokkaydo orolidagi o‘z-o‘zini mudofaa qilish kuchlari bazasidan topishdi. U qutqaruvchilarga xaroba kulbadagi eski to‘shakda uxlaganini aytdi. Bolaning ta’kidlashicha, u so‘nggi bir hafta davomida hech narsa yemasdan, faqat suv ichgan. Qutqaruvchilar unga yegulik berganida, bola “ochko‘zlik bilan” uni paqqos tushirgan.
Bolakayning ota-onasi aytib berishicha, o‘zini yomon tutgani uchun uni o‘rmondagi yo‘l yoqasida mashinadan tushirib qoldirishgan. Keyinroq ular qaytib kelgan, ammo bola u yerda bo‘lmagan. Dastlab ular bu haqda hech kimga aytmagan, chunki o‘z xatti-harakatlaridan uyalgan. Bolaning otasi juda oshirib yuborganini tan oldi, ammo o‘g‘liga nisbatan to‘g‘ri ish qilishni istaganini aytdi.
Bolani qidirishga yuzlab politsiyachilar, o‘t o‘chiruvchilar va harbiylar jalb qilindi. Hozir Tanuka tinkasi qurigan holatda kasalxonada yotibdi. Uning qo‘l va oyoqlari tirnalgan, biroq umuman olganda, u jabrlangani yo‘q.
Izoh (0)