JARda Nelson Mandelaning merosi bo‘lishib olindi
JARning ramziga aylanib qolgan siyosatchi, aparteidga qarshi kurash qahramoni Nelson Mandelaning (1918–2013) vafotidan ikki yarim yil o‘tib, uning vasiylari 40 nafar merosxo‘r shaxslarga va tashkilotlarga 22 million rand (1,4 million dollar) miqdorida meros pullarini to‘ladi. Siyosatchining butun mol-mulki 46 million randga (3 million dollar) baholangan edi, deb xabar beradi “TASS”.
“Biz vazifamizni to‘kis bajardik, uning so‘raganini amalga oshirdik”, — dedi JAR oliy sudyasi o‘rinbosari Dikgang Moseneke.
U meros atrofida bahslar kelib chiqmaganini alohida qayd qilib o‘tdi.
“Oilada ixtilof kelib chiqmadi, u birdam bo‘lib bizga yordam berdi”, — ta’kidladi vasiy.
Qarindoshlardan tashqari, merosxo‘rlar sifatida Mandelaning shaxsiy haydovchisi Maykl Maponya, yordamchisi Zelda le Granj va ikki xodimi, shuningdek, u o‘qigan maktab va universitetlar ham ko‘rsatilgan edi.
Xodimlarga 50 ming randdan (3,5 ming dollar) berildi. Mandela tug‘ilib o‘sgan va dafn etilgan Kunu qishlog‘idagi o‘rta maktabga, Fort-Xeyr va Yoxannesburg universitetlariga 100 ming randdan (7 ming dollar) pul ajratildi.
Shu bilan birga, merosxo‘rlar ro‘yxatiga Mandelaning ikkinchi rafiqasi va siyosiy kurashdagi hamkorlaridan biri Vinni Madikizela-Mandela kiritilmadi. Bundan norozi bo‘lgan ayol Mandelaning uchinchi rafiqasi Grasa Masheldan Kunudagi uyni tortib olish maqsadida uni sudga berdi. Bir necha instansiyalarda biror natijaga erisha olmagan Madikizela-Mandela Oliy apellyatsiya sudiga murojaat qildi. Vasiylar sud eshituvlari yakunlanguniga qadar Kunudagi uy merosiyligi masalasini to‘xtatib turishga qaror qildi.
O‘z navbatida, Mandelaning Vinnidan bo‘lgan qizlari Zenani va Zinzining har biriga 3 million randdan (200 ming dollar), ularning yetti nafar farzandi va nabirasi Zozukuga esa 100 ming randdan (7 ming dollar) berildi.
Grasa Mashel birinchi turmush o‘rtog‘i, Mozambik prezidenti Samora Mashel aviahalokat qurboni bo‘lganidan so‘ng Mandelaga turmushga chiqqandi. U Mandeladan qolgan boylikning yarmini olishi lozim edi, ammo marhum siyosatchining ko‘p sonli bolalari va nabiralari foydasiga merosdan voz kechdi.
