O‘rtayer dengizida topilgan bo‘laklar EgyptAir kompaniyasining 19-may kuni radarlardan yo‘qolgan A320 samolyotiga tegishli emas. Bu haqda Gretsiya havo xavfsizligi qo‘mitasi rahbari Atanassios Binis ma’lum qildi, deb yozadi Meduza.
“Topilgan buyumlar ekspertizasi ularning samolyot qismlari emasligini ko‘rsatdi”, — dedi u. Uning so‘zlariga ko‘ra, bu Misr hukumati tomonidan ham tasdiqlangan.
Atanassiosning bayonotini EgyptAir vitse-prezidenti Ahmed Adel ham tasdiqladi, avvalroq Gretsiyaning Karpatos oroli yaqinida topilgan bo‘laklar g‘oyib bo‘lgan samolyotga tegishli ekanligini uning o‘zi ma’lum qilgan edi.
Parijdan Qohiraga uchayotgan samolyot Gretsiya havo hududiga kirgandan 20 daqiqa o‘tib, radarlardan g‘oyib bo‘ldi. MS804 reysi bortida 56 nafar yo‘lovchi (ulardan uch nafari bola) va o‘n nafar ekipaj a’zosi bor edi. Ularning taqdiri hozircha noma’lum.
“Mayadin” telekanali, EgyptAir aviakompaniyasidagi manbasiga tayanib, samolyot O‘rtayer dengiziga qulaganini bildirgandi.
Ilgariroq AQSh razvedkasi halokatning asosiy sababi sifatida teraktni ko‘rayotgani xabar qilingan edi. Bundan tashqari, Misr fuqarolik aviatsiyasi vaziri Sharif Fathiy terrorchilik hujumi aqlga kelayotgan birinchi ehtimol ekanligini tan olgandi.
Izoh (0)