Hindiston shimolida kunlik harorat Selsiy bo‘yicha 50,5 darajaga yetdi, besh shtatda favqulodda vaziyat e’lon qilindi. Bu haqda 19-may, payshanba kuni mamlakat meteorologiya departamenti ma’lum qildi, deya xabar beradi “TASS”.
18-may, chorshanba kuni Rojaston shtatining Pxalodi shahrida 50,5 daraja harorat qayd etilgan, bu Hindiston ob-havo kuzatuvlari tarixidagi mutloq rekorddan atigi 0,1 darajaga kam.
“1956-yili shu shtatning Alvar shahrida Selsiy bo‘yicha 50,6 daraja harorat kuzatilgan, — deya ta’kidlagan departament direktori Braxma Prakash Yadav. — Biroq yaqin kunlarda Shimoliy, G‘arbiy va Markaziy Hindistonda harorat faqat ko‘tarilib boradi, shu bois mazkur rekord zabt etilishi mumkin”.
Yuzaga kelgan vaziyatdan kelib chiqib, Hindiston tabiiy ofatlar oqibatlarini bartaraf etish milliy boshqarmasi Xaryana, Rojaston, Gujarot, Madxya-Pradesh shtatlari va Dehli ittifoqdosh hududida favqulodda vaziyat e’lon qildi.
Izoh (0)