AQShning Markaziy razvedka boshqarmasi (MRB) xodimi Senat tomonidan tayyorlangan AQShda so‘roqlar chog‘ida qiynoqlar qo‘llanilishi haqidagi ma’ruzaning elektron versiyasini o‘chirib yubordi, deb yozadi Daily Mail.
Maxsus xizmatdagilar 6,7 ming sahifalik hujjat tasodifan o‘chirib yuborilganini ta’kidlamoqda. Shuningdek, ehtiyotsizlik tufayli, hisobot saqlanayotgan qattiq disk ham yo‘q qilingan.
Ta’kidlanishicha, hodisa o‘tgan yilning yozida sodir bo‘lgan, ammo endigina bu haqda ma’lum bo‘lgan. Dastlab ma’ruza yagona nusxada bo‘lgani haqida xabarlar tarqalgan bo‘lsa, keyinroq razvedka boshqarmasidagi manba muassasa ixtiyorida hisobotning kamida yana bitta nusxasi borligini, u bosh qarorgohdagi seyfda saqlanishini aytdi.
Vaziyat senator Diana Faynstaynni xavotirga soldi. U MRB rahbari Jon Brennan va AQSh bosh prokurori Loretta Linchga xat yuborib, unga hujjat nusxasini taqdim etishni talab qildi.
2014-yil oxirida AQSh Kongressi mamlakat maxsus xizmatlari tomonidan terrorchilikda gumon qilinayotgan shaxslarga nisbatan qiynoqlar qo‘llangani haqida rasmiy hisobot e’lon qilgan, shundan so‘ng prezident Barak Obama “Amerika qadriyatlariga to‘g‘ri kelmaydigan” bunday uslublardan ortiq hech qachon foydalanilmasligini ma’lum qilgandi.
Izoh (0)