Bir muddat avval Shohrux reper 2,5 yil avval oila qurgani, Islom ismli bir yashar o‘g‘li ham borligi haqida xabarlar, xususan, xonandaning intervyulari chiqqandi. 12-may kuni esa hamma hayratda qoldi: “Yakkasaroy” to‘yxonasida Shohrux reperning nikoh to‘yi bo‘lib o‘tdi.
Aksariyat odamlar uchun noodatiy hisoblangan mazkur holat yuzasidan jurnalist Feruz Muhammad reperdan intervyu oldi.
— Avvalgi intervyumizda “biroz avvalroq kichikroq to‘y qilib uylangan ekansiz, yaqin vaqtda esa katta to‘yni o‘tkazmoqchi ekansiz, shunday gap-so‘zlar bor”, deb savol berganimda, javob berishni xohlamagan edingiz. Oradan ikki oy o‘tar-o‘tmas san’at ahli, do‘stlaringiz davrasida to‘yingiz bo‘lib o‘tdi. O‘shandagi mavhumlikning sababi nima?— Gaplaringiz to‘g‘ri, men shaxsiy hayotimni ovoza qilmaslik uchun maksimal darajada harakat qilgan edim. Bu yangilik yaqinlarim va do‘stlarim uchun syurpriz bo‘lishini xohlagandim.
— Ijtimoiy tarmoqlardagi sahifalaringizda: “Bundan 2,5 yil avval sha’riy va qonuniy nikohdan o‘tib, bayram qilib oila qurganman”, deb yozibsiz. Katta to‘y qilish rejasi 2,5 yil avval ham bormidi?— Albatta, har kimda bo‘lganidek, men ham to‘y qilishni orzu qilganman. Lekin ba’zi bir sabablarga ko‘ra tantananing sanasini cho‘zishga majbur bo‘ldim. Vaqti kelganda esa rejamni amalga oshirdim.
— Ko‘pchilik odatda bunday holatga — avval nikohdan o‘tamiz, to‘y esa keyinroq bo‘ladi, degan gapga rozi bo‘lmaydi. Turmush o‘rtog‘ingiz, uning oilasi bu taklifga qarshilik qilmaganmi?— Qarshilik bo‘lishi ham mumkin emas, chunki boshqa iloji yo‘q edi. Men bergan taklif eng to‘g‘ri taklif bo‘lgan.
— Balki endi oilangiz haqida muxlislaringizga aniqroq ma’lumot berish vaqti kelgandir?— Hamma narsaning o‘z vaqti-soati bor.
— Xonanda Shahzodaning so‘nggi konsertida uning boshqa duetdoshlaridan ko‘ra Siz bilan aytgan qo‘shig‘ini muxlislar juda katta qiziqish, olqishlar bilan kutib oldi. O‘zingiz qachon konsert bermoqchisiz?— Buni ham aniq ayta olmayman. O‘ylashimcha, eng yaxshi narsa har doim sir bo‘lib, syurprizga aylanishi kerak.
Izoh (0)