GM Uzbekistan qo‘shma korxonasining Andijon viloyati Asaka shahridagi zavodida yangi avtomobillar ishtirokida “25 UZ” yozuvi hosil qilindi. Bu haqda “Kamolot” yoshlar ijtimoiy harakatining Facebook sahifasida xabar berildi. Bu O‘zbekiston mustaqilligining 25 yilligi munosabati bilan o‘tkazilayotgan “25” aksiyasi doirasida amalga oshirildi.
Suratlarda Cobalt avtomobillari ishtirokida “25 UZ”, Matiz’lar yordamida esa “25” raqami hosil qilinganini ko‘rish mumkin.
Shuningdek, GM Uzbekistan zavodining faoliyati hamda ushbu aksiyaning amalga oshirilishi aks etgan ta’sirli video “Kamolot” saytiga joylangan.
Eslatib o‘tamiz, avvalroq Andijon davlat universiteti Fizika-matematika fakulteti talabalari O‘zbekiston Mustaqilligining 25 yilligiga bag‘ishlab, rangli suv to‘ldirilgan stakanlardan davlat bayrog‘ini yasagan edi.
Ma’lumot uchun, O‘zbekistonning turli burchaklarida mamlakat Mustaqilligining 25 yilligiga bag‘ishlab “Vatanimga dil izhori” aksiyalari o‘tkazilmoqda va uning ishtirokchilari tomonidan asosan 25 soni turli yo‘sinda aks ettirilmoqda.
Izoh (0)