Yevropa futbol uyushmalari ittifoqi (UEFA)ning hakamlar qo‘mitasi angliyalik referi Mark Klatterburgni Yevropa Chempionlar Ligasi finaliga bosh hakam etib tayinladi, shvetsiyalik Yonas Erikssonga Yevropa Ligasi finali topshirildi, deb xabar bermoqda “iSport.ua”.
41 yoshli Klattenburg 2007-yildan buyon xalqaro toifadagi hakam sifatida faoliyat olib bormoqda. U shu vaqtga qadar ikkita final – 2012-yilgi Angliya Liga Kubogi hamda London–2012 Olimpiadasi futbol musobaqasining hal qiluvchi bahslarini boshqargan.
Joriy mavsumda u Yevropa Ligasining ikkita, Yevropa Chempionlar Ligasining oltita, shu jumladan, “Atletiko” va “Bavariya” (1:0) o‘rtasidagi dastlabki yarim final uchrashuvini boshqargan.
42 yoshli Eriksson 2002-yildan buyon xalqaro toifadagi hakam sifatida ishlab kelmoqda. Shvetsiyalik referi 2013-yilgi UEFA Superkubogini boshqargan hamda Braziliyada 2014-yili bo‘lib o‘tgan Jahon chempionatida ishlagan. O‘tgan mavsumda esa Yonas Erikssonga “Barselona” va “Yuventus” o‘rtasida o‘tkazilgan hamda kataloniyaliklarning 3:1 hisobidagi g‘alabasi bilan yakunlangan Yevropa Chempionlar Ligasi finali topshirilgan edi.
Joriy mavsumda shvetsiyalik hakam Yevropa Ligasining bitta, Yevropa Chempionlar Ligasining beshta, shu jumladan, “Bavariya” va “Yuventus” (4:2) o‘rtasidagi nimchorak final javob uchrashuvini boshqargan.
Eslatib o‘tamiz, 18-may kuni Bazel shahridagi “Sankt-Yakob Park” stadionida bo‘lib o‘tadigan Yevropa Ligasi finalida “Liverpul” va “Sevilya” jamoalari o‘zaro bahs olib boradi. 28-may kuni Milan shahridagi “San-Siro” stadionida o‘tkaziladigan Yevropa Chempionlar Ligasi finalida esa Madridning ikki klubi — “Real” va “Atletiko” bosh sovrin uchun bellashadi.
Izoh (0)