Европа футбол уюшмалари иттифоқи (УЕФА)нинг ҳакамлар қўмитаси англиялик рефери Марк Клаттербургни Европа Чемпионлар Лигаси финалига бош ҳакам этиб тайинлади, швециялик Йонас Эрикссонга Европа Лигаси финали топширилди, деб хабар бермоқда «iSport.ua».
41 ёшли Клаттенбург 2007 йилдан буён халқаро тоифадаги ҳакам сифатида фаолият олиб бормоқда. У шу вақтга қадар иккита финал – 2012 йилги Англия Лига Кубоги ҳамда Лондон–2012 Олимпиадаси футбол мусобақасининг ҳал қилувчи баҳсларини бошқарган.
Жорий мавсумда у Европа Лигасининг иккита, Европа Чемпионлар Лигасининг олтита, шу жумладан, «Атлетико» ва «Бавария» (1:0) ўртасидаги дастлабки ярим финал учрашувини бошқарган.
42 ёшли Эрикссон 2002 йилдан буён халқаро тоифадаги ҳакам сифатида ишлаб келмоқда. Швециялик рефери 2013 йилги УЕФА Суперкубогини бошқарган ҳамда Бразилияда 2014 йили бўлиб ўтган Жаҳон чемпионатида ишлаган. Ўтган мавсумда эса Йонас Эрикссонга «Барселона» ва «Ювентус» ўртасида ўтказилган ҳамда каталонияликларнинг 3:1 ҳисобидаги ғалабаси билан якунланган Европа Чемпионлар Лигаси финали топширилган эди.
Жорий мавсумда швециялик ҳакам Европа Лигасининг битта, Европа Чемпионлар Лигасининг бешта, шу жумладан, «Бавария» ва «Ювентус» (4:2) ўртасидаги нимчорак финал жавоб учрашувини бошқарган.
Эслатиб ўтамиз, 18 май куни Базел шаҳридаги «Санкт-Якоб Парк» стадионида бўлиб ўтадиган Европа Лигаси финалида «Ливерпуль» ва «Севилья» жамоалари ўзаро баҳс олиб боради. 28 май куни Милан шаҳридаги «Сан-Сиро» стадионида ўтказиладиган Европа Чемпионлар Лигаси финалида эса Мадриднинг икки клуби — «Реал» ва «Атлетико» бош соврин учун беллашади.
Изоҳ (0)