Kanadaning Kvebek provinsiyasida yashovchi 15 yoshli Uilyam Gaduri Yukatan (Markaziy Amerikadagi yarim orol) changalzorlarida yo‘qolib ketgan mayyalar shahrini qidirib topdi, deya xabar bermoqda The Independent. U buni Kanada kosmik agentligi (CSA)ning xarita servisi orqali amalga oshirdi.
Gaduri mayyalar yulduz xaritalarini ularning yirik manzilgohi xaritasi bilan taqqoslash orqali shaharni topishga muvaffaq bo‘ldi. Shaharlarning ko‘pchiligi (120 ga yaqini) hindularga ma’lum bo‘lgan 22 ta yulduz turkumiga mos bo‘lib chiqdi. Bundan tashqari, o‘quvchi bola osmon gumbazining uchta yulduzdan iborat yangi qismini aniqladi, ulardan ikkitasi shaharlarga muvofiq keldi.
Gaduri uchinchi yulduz ham mayyalar manzilgohiga to‘g‘ri kelishi kerak, deb hisobladi va CSA’ga ushbu hududning sun’iy yo‘ldoshdan olingan suratlarini taqdim etishni so‘rab murojaat qildi. Suratlarda o‘quvchi antropogen xususiyatlarga ega relyef elementlarini aniqladi, ular qadimiy shahar qoldiqlarini eslatar edi. Kanadalik o‘zi topgan manzilgohni K’aak Chi deb atadi, u tarjima qilinganida “Olovli og‘iz” degan ma’noni anglatadi.
O‘quvchi bolaning topilmasi rost-yolg‘onligini tekshirib ko‘rish imkoni tug‘ilganicha yo‘q — mayyalar shahri Yukatan changalzorlaridagi deyarli o‘tib bo‘lmaydigan nuqtalarda joylashgan.
Izoh (0)