Канаданинг Квебек провинциясида яшовчи 15 ёшли Уильям Гадури Юкатан (Марказий Америкадаги ярим орол) чангалзорларида йўқолиб кетган майялар шаҳрини қидириб топди, дея хабар бермоқда The Independent. У буни Канада космик агентлиги (CSА)нинг харита сервиси орқали амалга оширди.
Гадури майялар юлдуз хариталарини уларнинг йирик манзилгоҳи харитаси билан таққослаш орқали шаҳарни топишга муваффақ бўлди. Шаҳарларнинг кўпчилиги (120 га яқини) ҳиндуларга маълум бўлган 22 та юлдуз туркумига мос бўлиб чиқди. Бундан ташқари, ўқувчи бола осмон гумбазининг учта юлдуздан иборат янги қисмини аниқлади, улардан иккитаси шаҳарларга мувофиқ келди.
Гадури учинчи юлдуз ҳам майялар манзилгоҳига тўғри келиши керак, деб ҳисоблади ва CSA’га ушбу ҳудуднинг сунъий йўлдошдан олинган суратларини тақдим этишни сўраб мурожаат қилди. Суратларда ўқувчи антропоген хусусиятларга эга рельеф элементларини аниқлади, улар қадимий шаҳар қолдиқларини эслатар эди. Канадалик ўзи топган манзилгоҳни K’aak Chi деб атади, у таржима қилинганида «Оловли оғиз» деган маънони англатади.
Ўқувчи боланинг топилмаси рост-ёлғонлигини текшириб кўриш имкони туғилганича йўқ — майялар шаҳри Юкатан чангалзорларидаги деярли ўтиб бўлмайдиган нуқталарда жойлашган.
Изоҳ (0)