Facebook’dagi “Voditeli Tashkenta” guruhida Yo‘l harakati qoidalariga xilof ravishda bekat ichida qoldirilgan va to‘xtab turgan Matiz avtomobili surati e’lon qilindi. Hodisa 25-aprel, dushanba kuni yuz bergan.
“Otaxon mashinani bekat ichida qoldirib, futbol ko‘rgani kirib ketdi. Hodisa “Panorama” (Alisher Navoiy nomidagi kinosaroy) oldida yuz berdi”, — deb yozadi fotoxabar muallifi. Xabar ostida “Voditeli Tashkenta” a’zolari o‘rtasida keksa haydovchining bu harakatlarini qanday baho berish kerakligi borasida qizg‘in muhokamalar bo‘lgan.
“Otaxon bo‘lsa, unda unga mumkin”, — qabilida fikr bildirgan foydalanuvchilarga qarshi boshqa bir guruh kommentatorlar: “U holda oradan 20—30 yil o‘tib bundan-da battar qoidabuzar otaxonlar paydo bo‘ladi”, — deb javob yozgan.
Yo‘l harakati qoidalari 91-bandiga muvofiq, bekat maydonchalarida, yo‘nalishli transport vositalari to‘xtash joylarida, yo‘nalishli transport vositalari to‘xtash joyi belgilari va bekatdan harakatlanish yo‘nalishi bo‘ylab (yetmasdan va o‘tib ketib) 15 metrdan kam masofada to‘xtash taqiqlanadi. Qoidalarning 92-bandiga ko‘ra, to‘xtash taqiqlangan joylarda to‘xtab turish ham taqiqlanadi.
Ma’muriy javobgarlik to‘g‘risidagi kodeksning 128-moddasi 1-qismiga muvofiq, haydovchilarning yo‘nalishli transport vositalari to‘xtaydigan bekatlardan yurishi eng kam ish haqining ikkidan bir qismi miqdorida (26-aprel holatiga ko‘ra — 65 120 so‘m), to‘xtash va to‘xtab turish qoidalarini buzishi esa eng kam ish haqining uch baravari miqdorida (390 720 so‘m) jarima solinishiga sabab bo‘ladi.
Ma’lumot uchun, 25-aprel kuni Alisher Navoiy nomli kinosaroy yonida joylashgan “Paxtakor” stadionida futbol bo‘yicha O‘zbekiston milliy chempionati doirasida “Paxtakor” va “Metallurg” jamoalari o‘rtasida uchrashuv bo‘lib o‘tdi. Unda “Paxtakor” 2:1 hisobida g‘alaba qozondi.
Izoh (0)