Ravon R2 ixcham xetchbeki Rossiyadagi dilerlarga aprel oxirigacha yetkazilishi kerak edi, ammo obyektiv sababga ko‘ra, yetkazib berish jarayoni kechikib qoldi, deb yozadi “Kolyosa” nashri.
“Bungacha O‘zbekistondan Rossiyaga barcha avtomobillar temir yo‘l orqali yetkazib berilar edi, — deya izohlashdi kompaniya matbuot xizmatidagilar. — Temir yo‘l orqali tashish tariflari keskin oshib ketdi. Bu tufayli avtomobillar narxi ham oshishi muqarrar edi”. Shu sababli yangi avtomobilni tashishning boshqa usuli topildi.
Ravon R2’ning birinchi partiyasi Rossiyaga avtovoz (avtomobil tashuvchi yuk mashinasi)larda yetkaziladi. Bunday yechim modelning avval e’lon qilingan narxini saqlab qolish imkonini berdi. Qolgan partiyalar narxi qanday o‘zgarishi ma’lum qilinmayapti.
Avvalroq Ravon R2 avtomobili Rossiyada 10-aprel — dastlabki buyurtmalar qabul qilina boshlaganidan bir oy o‘tib, savdoga chiqishi xabar berilgan edi.
Eslatib o‘tamiz, avtomobilning 1,25 litrli, 4 silindrli, 85,5 ot kuchiga ega dvigatel va minimal komplektatsiyadagi Comfort AT versiyasi bahosi 369 ming rubl (taxminan 5600 dollar)dan boshlanadi.
Optimum AT versiyasida xaridor ikkita o‘rniga to‘rtta xavfsizlik yostiqchasi, eshiklarni blokirovka qilish tugmalari, passiv signalizatsiya, bort kompyuteri, konditsioner va boshqa qulayliklarga ega bo‘ladi. Bunday mashina narxi 439 ming rubldan (6680 dollar atrofida) boshlanadi.
Elegant deb nomlangan maksimal komplektatsiyada oldingi versiyalarga qo‘shimcha oltita xavfsizlik yostiqchasi, oldingi o‘rindiqlarning isitilishi, olti kolonkali audiotizim, to‘rtta eshikda elektr oyna ko‘targichlar, rulga o‘rnatilgan audiotizimni boshqarish pulti taklif etiladi. Bunday avtomobilga 469 ming rubl (7150 dollar atrofida) va undan yuqori narx belgilangan.
Izoh (0)