Facebook’даги «Водители Ташкента» гуруҳида Йўл ҳаракати қоидаларига хилоф равишда бекат ичида қолдирилган ва тўхтаб турган Matiz автомобили сурати эълон қилинди. Ҳодиса 25 апрель, душанба куни юз берган.
«Отахон машинани бекат ичида қолдириб, футбол кўргани кириб кетди. Ҳодиса «Panoрама» (Алишер Навоий номидаги киносарой) олдида юз берди», — деб ёзади фотохабар муаллифи. Хабар остида «Водители Ташкента» аъзолари ўртасида кекса ҳайдовчининг бу ҳаракатларини қандай баҳо бериш кераклиги борасида қизғин муҳокамалар бўлган.
«Отахон бўлса, унда унга мумкин», — қабилида фикр билдирган фойдаланувчиларга қарши бошқа бир гуруҳ комментаторлар: «У ҳолда орадан 20—30 йил ўтиб бундан-да баттар қоидабузар отахонлар пайдо бўлади», — деб жавоб ёзган.
Йўл ҳаракати қоидалари 91-бандига мувофиқ, бекат майдончаларида, йўналишли транспорт воситалари тўхташ жойларида, йўналишли транспорт воситалари тўхташ жойи белгилари ва бекатдан ҳаракатланиш йўналиши бўйлаб (етмасдан ва ўтиб кетиб) 15 метрдан кам масофада тўхташ тақиқланади. Қоидаларнинг 92-бандига кўра, тўхташ тақиқланган жойларда тўхтаб туриш ҳам тақиқланади.
Маъмурий жавобгарлик тўғрисидаги кодекснинг 128-моддаси 1-қисмига мувофиқ, ҳайдовчиларнинг йўналишли транспорт воситалари тўхтайдиган бекатлардан юриши энг кам иш ҳақининг иккидан бир қисми миқдорида (26 апрель ҳолатига кўра — 65 120 сўм), тўхташ ва тўхтаб туриш қоидаларини бузиши эса энг кам иш ҳақининг уч баравари миқдорида (390 720 сўм) жарима солинишига сабаб бўлади.
Маълумот учун, 25 апрель куни Алишер Навоий номли киносарой ёнида жойлашган «Пахтакор» стадионида футбол бўйича Ўзбекистон миллий чемпионати доирасида «Пахтакор» ва «Металлург» жамоалари ўртасида учрашув бўлиб ўтди. Унда «Пахтакор» 2:1 ҳисобида ғалаба қозонди.
Изоҳ (0)