“Zaporojets” avtomobillarini ishlab chiqaruvchisi hisoblangan Ukrainadagi “ZAZ” avtozavodi aprel oyi oxiridan qayta ishga tushib, yangi model — ZAZ Vida Pick-up’ni konveyerga qo‘yishini ma’lum qildi. Bu haqda “Autonews.ru” xabar bermoqda.
“ZAZ” 2012-yildan beri T250 platformasidagi Chevrolet Aveo avtomobilini ZAZ Vida nomi bilan ishlab chiqaradi. Kompaniya 2013-yili Vida sedanining feyslift qilingan variantini namoyish etgan, biroq yangilangan model seriyalab ishlab chiqarishga qo‘yilmagan edi.
Qayd etish joiz, 2016-yildan O‘zbekistonda yig‘ilishi kutilayotgan T250 platformasidagi Ravon Nexia’ning old ko‘rinishi “ZAZ” 2012-yildan beri ishlab chiqarayotgan ZAZ Vida xetchbeki bilan bir xil.
Xabar berishlaricha, endi “ZAZ” old tomoni Ravon Nexia bilan qariyb bir xil bo‘lgan, biroq orqa tomoni ZAZ Lanos pikapiga o‘xshash modelni aprel oyi oxiridan seriyalab ishlab chiqara boshlaydi va bu model aynan ZAZ Lanos pikapiga o‘rinbosar bo‘ladi.
E’tiborli tomoni, O‘zbekistonda hozirning o‘zida umumiy ko‘rinishi Ravon Nexia’ga o‘xshash (faqat old chehrasi boshqacharoq) ZAZ Vida sedanini ham, old tomoni Ravon Nexia’niki bilan qariyb bir xil ZAZ Vida xetchbekini ham sotib olish mumkin.
Eslatib o‘tamiz, Ravon Nexia 2016-yilning ikkinchi choragidan seriyalab ishlab chiqarilishi haqida avvalroq xabar berilgan edi. Rossiyada bozorida 2016-yil iyulidan paydo bo‘lishi kutilayotgan avtomobil Andijon va Toshkent ko‘chalarida sinovdan o‘tkazilayotgani ma’lum qilingan edi.
Izoh (0)