Braziliyaning Rio-de-Janeyro shahrida trampolin bo‘yicha o‘tkazilgan litsenzion musobaqada o‘zbekistonlik Yekaterina Xilko saralash bosqichidan muvaffaqiyatli o‘tib, kuchli sakkizlikdan joy oldi va eng asosiysi Rio–2016 Olimpiada o‘yinlariga yo‘llanmani qo‘lga kiritdi, deb xabar qilmoqda O‘zbekiston Milliy olimpiya qo‘mitasi matbuot xizmati.
E’tiborlisi, Rio–2016 Olimpiada o‘yinlari Yekaterina Xilkoning faoliyatidagi beshinchisi bo‘ladi. Tajribali sportchi 4 yillikning eng nufuzli turnirida ilk debyutini 2000-yili Sidney (Avstraliya)da bo‘lib o‘tgan Olimpiada o‘yinlarida o‘tkazgan edi. Shundan buyon Yekaterina ketma-ket Olimpiada o‘yinlarida qatnashish baxtiga muyassar bo‘lib kelmoqda.
Qayd etish joizki, dunyo trampolinchilari orasida shu kunga qadar to‘rt nafar sportchi to‘rt marotabadan Olimpiada o‘yinlarida qatnashish huquqini qo‘lga kiritgan edi. Beshinchi bor Olimpiadada ishtirok etadigan Yekaterina Xilko bu borada jahonda yakka peshqadamga aylandi.
Ma’lumot uchun, Yekaterina Xilko 2008-yili Pekin (Xitoy)da o‘tkazilgan Olimpiada o‘yinlarida bronza medaliga sazovor bo‘lgan.
Shu tariqa, o‘zbekistonlik sportchilarning Rio—2016 o‘yinlariga qo‘lga kiritgan yo‘llanmalari soni 66 taga yetdi. Ulardan 25 tasi paralimpiyachilarga tegishlidir.
Mavzuga oid:
Izoh (0)