Shu paytga qadar Pxenyan metrosi dunyodagi eng maxfiy manzillardan biri bo‘lib kelayotgandi, biroq fotograf Elliot Devisga unda sayohat qilish va bekatlarining suratlarini olishga ijozat berildi. Safar haqidagi hisobotni u o‘zining shaxsiy saytida e’lon qildi, deya hikoya qiladi TJournal.
Oldinlari xorijliklarga Shimoliy Koreya metrosining faqat ikki bekatini suratga olishga ruxsat berilar, shu sababli jurnalistlar shaharda aslida hech qanday yerosti transporti tizimi yo‘qligi, uning chet elliklar uchun ochiq qismi esa ko‘zbo‘yamachilik ekanligini ta’kidlab kelardi.
Devis bu da’volarni inkor etib, Pxenyan metrosining 16 bekatdan iborat ikkala tarmog‘ida sayr qildi va o‘z taassurotlari bilan o‘rtoqlashishga muvaffaq bo‘ldi.
Shimoliy Koreya yerosti transporti tizimi dunyodagi eng chuqur metrolardan biri hisoblanadi, uning ayrim bekatlari yer sathidan 110 metr pastda joylashgan. Biroq o‘rtacha chuqurligi bo‘yicha Sankt-Peterburg metrosidan ortda qoladi.
Pxenyan metrosining eskalatoridan tushish odatda to‘rt daqiqa vaqt oladi va bu muddat davomida shahar aholisi vatanparvarlik ruhidagi musiqa eshitishga majbur. Metro bir vaqtning o‘zida qudratli po‘lat darvozalarga ega bombadan yashirinish joyi bo‘lib ham xizmat qiladi.
Elliot Devis Shimoliy Koreya yerosti transport tizimi o‘ta samarali va toza ekanligini e’tirof etdi. U ko‘plab byustlar va mozaikali manzaralar o‘rin olgan bekatlar jozibadan xoli emasligini qayd qildi.
Izoh (0)