Шу пайтга қадар Пхеньян метроси дунёдаги энг махфий манзиллардан бири бўлиб келаётганди, бироқ фотограф Эллиот Дэвисга унда саёҳат қилиш ва бекатларининг суратларини олишга ижозат берилди. Сафар ҳақидаги ҳисоботни у ўзининг шахсий сайтида эълон қилди, дея ҳикоя қилади TJournal.
Олдинлари хорижликларга Шимолий Корея метросининг фақат икки бекатини суратга олишга рухсат берилар, шу сабабли журналистлар шаҳарда аслида ҳеч қандай ерости транспорти тизими йўқлиги, унинг чет элликлар учун очиқ қисми эса кўзбўямачилик эканлигини таъкидлаб келарди.
Дэвис бу даъволарни инкор этиб, Пхеньян метросининг 16 бекатдан иборат иккала тармоғида сайр қилди ва ўз таассуротлари билан ўртоқлашишга муваффақ бўлди.
Шимолий Корея ерости транспорти тизими дунёдаги энг чуқур метролардан бири ҳисобланади, унинг айрим бекатлари ер сатҳидан 110 метр пастда жойлашган. Бироқ ўртача чуқурлиги бўйича Санкт-Петербург метросидан ортда қолади.
Пхеньян метросининг эскалаторидан тушиш одатда тўрт дақиқа вақт олади ва бу муддат давомида шаҳар аҳолиси ватанпарварлик руҳидаги мусиқа эшитишга мажбур. Метро бир вақтнинг ўзида қудратли пўлат дарвозаларга эга бомбадан яшириниш жойи бўлиб ҳам хизмат қилади.
Эллиот Дэвис Шимолий Корея ерости транспорт тизими ўта самарали ва тоза эканлигини эътироф этди. У кўплаб бюстлар ва мозаикали манзаралар ўрин олган бекатлар жозибадан холи эмаслигини қайд қилди.
Изоҳ (0)