Eng yirik Yaponiya kompaniyalari, shu jumladan, Toyota, Honda va Nissan avtomobil ishlab chiqaruvchilari, shuningdek, Sony va Fujifilm elektronika kompaniyalari 2011-yildan buyon kuzatilgan eng vayronkor zilziladan zarar ko‘rgan hududda o‘z korxonalari ishini to‘xtatib qo‘ydi, deb yozadi “Interfaks”.
Toyota Kyusyu orolidagi zavodlari detallar yetkazib berishdagi uzilishlar tufayli yopilganini ma’lum qildi. Firma hisob-kitoblariga ko‘ra, zilzila natijasida uning operatsiya daromadi joriy chorakda 30 milliard iyena (277 million dollar)ga qisqarishi mumkin.
Honda Kumamoto prefekturasidagi zavodida mototsikllar ishlab chiqarishni vaqtinchalik to‘xtatgan bo‘lsa, Nissan korxonaning Fukuoka prefekturasidagi faoliyatini binoga yetgan zararni baholash uchun to‘xtatib qo‘ydi.
Nashr eslatishicha, 14-aprel va 16-aprelda Kyusyu orolining g‘arbiy sohilidagi Kumamoto prefekturasida ikkita yirik zilzila sodir bo‘ldi. Ofat natijasida 42 kishi halok bo‘ldi, 2 mingdan ziyod kishi jabr ko‘rdi, 110 mingdan ortiq kishi boshpanalarga evakuatsiya qilindi.
Izoh (0)