Rossiya prezidenti Vladimir Putin to‘g‘ridan-to‘g‘ri muloqot chog‘ida “Panama arxivi”dagi ofshorlar haqidagi ma’lumot haqqoniy ekanligini ma’lum qildi. Bu haqda Meduza xabar bermoqda.
Shu bilan birga, Putin ofshorlar haqidagi tekshiruvlar mualliflari hech kimni bevosita ayblamay, “kosa tagidagi nimkosa” qabilida ish yuritayotganligini bildirdi. Uning aytishicha, tekshiruvlarni jurnalistlar emas, yuristlar olib borgan.
Davlat rahbari ofshorlar haqidagi hujjatlarning e’lon qilinishiga AQSh rasmiy muassasalari xodimlari aloqador ekanligi, noma’lum manba “Panama arxivi” materiallarini yetkazgan Germaniyaning Süddeutsche Zeitung nashri amerikaliklar boshqaradigan mediaxolding tarkibiga kirishini ta’kidladi. Bunga Putin “Hamma joydan buyurtmachining qulog‘i ko‘rinib turibdi”, deya izoh berdi.
Ma’lumot uchun, “Panama arxivi” hujjatlarida Putinning do‘sti, violonchelchi Sergey Roldugin bir necha milliard dollar aylanmaga ega ofshorlarni 2015-yilga qadar boshqargani haqida so‘z boradi. Muloqot davomida prezident do‘sti barcha mablag‘larni musiqa asbob-anjomlari sotib olishga sarflaganini ma’lum qildi.
Izoh (0)