Mossack Fonseca компанияси 13 апрель, чоршанба куни дунё матбуотида офшор фирмаларига тегишли ички ҳужжатлари чоп этилиши билан боғлиқ шов-шувни текширишда Панама ҳукумати билан ҳамкорлик қилишга тайёрлигини билдирди, деб ёзади «ТАСС».
«Биз саволлар туғилганида ва қўшимча ахборотга эҳтиёж сезилганида, тегишли ҳукуматлар билан турли юрисдикцияларда фаол ҳамкорлик бўйича катта тажрибага эгамиз, ва шубҳали фаолият аниқланганида, кўп ҳолларда биз ўз ташаббусимиз билан алоқага чиқамиз», — дейилади компания баёнотида.
«Биз бизнес юритиб келаётган қарийб 40 йил давомида бўлгани каби, ҳукумат билан унинг сўнгги текширувида яна ҳамкорлик қилиб, вазиятни охиригача олиб бориш учун тайёрлигимизни билдирамиз», — деди Mossack Fonseca.
Маълумот учун, Mossack Fonseca компанияси маълумотлар базасидан ахборот чиқиб кетиши натижасида ОАВларда қатор дунё етакчилари ва уларнинг яқинлари пул ювиш ва солиқлардан бош тортиш бўйича схемаларга алоқадорлиги ҳақида маълумот пайдо бўлган эди. Компания фаолияти Журналистлик текширувлари халқаро консорциуми (ICIJ) томонидан ўрганилмоқда, бунга консорциум қўлга киритган компаниянинг 11,5 миллионга яқин ҳужжати асос бўлган. Уларда 12 нафар собиқ ва амалдаги давлат етакчилари, Forbes рўйхатидаги 29 нафар миллиардер, шунингдек, кино ва спорт юлдузлари номлари келтирилган.
Аввалроқ Салвадор расмийлари Панаманинг Mossack Fonseca юридик компанияси офисида рейд ўтказиб, ҳужжатлар ҳамда қурилмаларни мусодара қилган эди.
Изоҳ (0)