13-aprel, chorshanba kuni O‘zbekiston Respublikasi axborot texnologiyalari va kommunikatsiyalarini rivojlantirish vazirligida Toshkentga “Standartlashtirishda farqlarning oldini olish” mintaqaviy forumida ishtirok etish uchun kelgan Xalqaro elektr aloqa ittifoqi elektr aloqani standartlashtirish byurosi direktori Li Che Sub bilan uchrashuv bo‘lib o‘tdi. Bu haqda vazirlik axborot xizmati ma’lum qildi.
Uchrashuv chog‘ida byuro bilan o‘zaro hamkorlik istiqbollari, jumladan, O‘zbekistondagi tarmoq oliy o‘quv yurtlari va ilmiy-tadqiqot muassasalari bilan mutaxassislar malakasini oshirish, ilmiy-tadqiqot imkoniyatlarini rivojlantirishdagi sheriklik masalalari muhokama qilindi. Tashkilotning IoT (“Buyumlar interneti”), Smart city (“Aqlli shahar”) kabi zamonaviy infokommunikatsiya texnologiyalarida foydalanish uchun standartlar ishlab chiqish borasidagi faoliyati yuzasidan fikr almashildi. Tomonlar O‘zbekistonda AKT sohasida standartlashtirish bo‘yicha byuroning yetakchi ekspertlari va boshqa xorijiy sheriklar ishtirokida seminar hamda treninglar o‘tkazish to‘g‘risida kelishib oldi.
Izoh (0)