Kerri: AQSh KXDRga ko‘mak berishga va muzokaralarga kirishishga tayyor

AQSh Koreya yarim orolidagi vaziyatni tinch yo‘l bilan tartibga solish bo‘yicha muzokaralarga tayyor, Vashington, hatto, KXDRga iqtisodiy ko‘mak ham berishi mumkin, ammo barchasi Pxenyanning xatti-harakatlariga bog‘liq. Bu haqda AQSh davlat kotibi Jon Kerriga tayanib, “TASS” xabar bermoqda.

“Biz ushbu muzokaralarga qaytishga tayyormiz. Biz yarim orol uchun tinchlik bitimini muhokama qilishga tayyor ekanligimizni aniq-ravshan bildirdik”, — dedi Kerri. U Vashington tomonlar tajovuzkorlikdan voz kechish haqidagi kelishuv bo‘yicha muhokamalarga kirishishiga qarshi emasligini ta’kidladi. “Aslida biz iqtisodiy ko‘mak taqdim etishga tayyormiz”, — deya qo‘shib qo‘ydi u.

Bundan tashqari, AQSh, davlat kotibi ta’kidlashicha, Janubiy Koreya bilan Koreyalarni birlashtirish konsepsiyasi ustida ishlashga tayyorligini bildirmoqda. “Biroq barchasi Shimoliy Koreyaning denuklearizatsiya bo‘yicha muzokaralarda qatnashish qaroriga bog‘liq” — dedi Kerri.